Maharashtra Assembly Elections 2024 : राज्यातील विधानसभा निवडणुकीबाबत महत्त्वाची माहिती समोर आली आहे. निवडणूक आचारसंहिता २० सप्टेंबरपासून लागू होणार असून मतदान ऑक्टोबरच्या तिसऱ्या किंवा चौथ्या आठवड्यात होण्याची शक्यता आहे, असे वरिष्ठ अधिकाऱ्यांनी सांगितले आहे. निवडणुकीची प्रक्रिया बहुधा एकाच टप्प्यात पार पडेल, अशी शक्यता व्यक्त करण्यात येत आहे.
एका अधिकाऱ्याने सांगितले की, २०१९ मध्ये २७ सप्टेंबर रोजी निवडणुकीची अधिसूचना जारी करण्यात आली होती, मतदान २१ ऑक्टोबर रोजी झाले होते, आणि निकाल २४ ऑक्टोबर रोजी घोषित करण्यात आले होते. आता, विधानसभा निवडणुकीसाठी तयारी सुरू असून, निवडणूक आयोगाच्या निर्देशानुसार अंतिम मतदार यादी २० ऑगस्ट २०२४ रोजी प्रसिद्ध करणे आवश्यक आहे.
निवडणूक आयोगाने २० जून रोजी महाराष्ट्र, हरियाणा, झारखंड आणि जम्मू-काश्मीरमधील मुख्य निवडणूक अधिकाऱ्यांना महत्त्वाच्या सूचना दिल्या आहेत. त्यांना १ जून २०२४ ही पात्र तारीख धरून फोटो मतदार यादीचा विशेष आढावा घेण्यास सांगितले आहे. सर्व नोंदणीकृत कुटुंब सदस्य एकाच विभागात असावेत आणि मतदार याद्या २० ऑगस्टला प्रसिद्ध केल्या जाणार आहेत.
निवडणूक आयोगाने राज्याच्या मुख्य कार्यकारी अधिकाऱ्यांना २४ जून २०२४ पूर्वी मतदान केंद्रांचे सुसूत्रीकरण, मतदार यादीतील त्रुटी सुधारणा, आणि छायाचित्रांची गुणवत्ता वाढवण्याचे निर्देश दिले आहेत. २५ जून पूर्वी एकात्मिक प्रारूप मतदार यादी प्रकाशित करावी, आणि प्रत्येक शनिवारी व रविवारी विशेष मोहीम राबवावी. अंतिम मतदार यादी २० ऑगस्ट रोजी प्रकाशित केली जाईल.